صباح الفل .. عادي برضو 😃
موضوعنا عن كابلات الداتا الخاصة بتوصيل الشاشة
إيه الأحسن و الفرق بين أنواعهم
هنتكلم زي عادتنا بتبسيط و بدون الدخول ف تفاصيل معقدة مش هتهمنا أوي
عندنا 4 أنواع للكابلات زى / VGA - DVI - HDMI - DP
و فيه أنواع كابلات تانية ، بس مش منتشرين أوي و ميهموناش حالياً
خلينا ف الـ أربعة دول لإنهم الأكثر إنتشاراً ...
---------------------------------------
1 - VGA
و هو الكابل الأقدم ، المعروف ب الوصلة الزرقا 😃
يقدر يعرضلنا ريزولوشن / 1920x1080 .. فل إتش دي
على تردد 60 هرتز .. بدون أى مشاكل
و إن كان ممكن يعلى شوية و يعرض ريزولوشن 2048X1536
و بيوصل لتردد 85 هرتز .. لكننا مش ضامنين إستقراره ف الحالة دي
و أغلب الشاشات إللى فيها مخرج VGA فقط
بتكون HD بريزولوشن / 1280X720 أو أقل
الحاجات القديمة إللى هى 19 بوصة فيما تحت
مع بعض موديلات الإستيراد .. الفل إتش دي .. و فيها المخرج دا
معتقدش حالياً فيه حد هيشغل ريزولوشن / فل إتش دي .. أو أعلى
على شاشة بمخرج VGA وحيد !
إما هيكون عنده مخارج تاني و يستخدمها ، أو هيكتفي بريزولوشن قليل
المخرج دا هو الأقدم ، لكن لغاية / 1920X1080 - 60HZ
عادي جداً و مفيهوش أدني مشكلة
و بيعرض صورة فقط ، ميقدرش ينقلك صوت لو الشاشة فيها سماعات
----------------------------------------------------
2 - DVI
الكابل المنتشر بكثرة ، و موجود حتي الأن رغم إنه قديم نسبياً
معروف ب الوصلة البيضا العريضة 😃
فيه منه كذا إصدارة ، لكن الأقوى هو / DVI D
يقدر يعرض ريزولوشن / 1920x1080 .. فل إتش دي
على تردد 120 هرتز .. تقريباً
و ريزولوشن / 2560x1600 .. تو كي
على تردد 60 هرتز .. تقريباً
و بيوصل لغاية ريزولوشن / 3840X2400 .. فور كي - تقريباً
على تردد 30 هرتز .. تقريباً
و بيعرض صورة فقط ، ميقدرش ينقلك صوت لو الشاشة فيها سماعات
----------------------------------------------------
3 - HDMI
الكابل الأكثر شهرة و إنتشاراً الأن
معروف ب وصلة الإتش دي 😃
فيه منه كذا إصدارة ، و هنتكلم عن إصدارتين
الأولي و هى المنتشرة و صاحبة الوجود الأكبر ف الفئات المتوسطة
فيرجن 1.4
تقدر تعرض ريزولوشن / 1920x1080 .. فل إتش دي
على تردد 120 هرتز .. تقريباً
و ريزولوشن 3840x2160 .. فور كي
على تردد 30 هرتز .. تقريباً
النوع التاني هو .. فيرجن 2
بيعرض ريزولوشن / 1920x1080 .. فل إتش دي
على تردد 144 هرتز .. تقريباً
و بتوصل لغاية ريزولوشن / 3840x2160 .. فور كي
على تردد 60 هرتز .. تقريباً
و بيعرض صوت و صورة ، هيطلعلك صوت من الشاشة نفسها لو فيها سماعات
زى ما بنشغل بلاى ستيشن ع التليفزيون و بنسمع صوته .. و هكذا
----------------------------------------------------
4 - DISPLAY PORT
و هو الكابل الأقوى ف كل الأنواع
بعيداً عن المقارنة بحاجة زى hdmi 2.1 طبعاً 😃
و كذلك فيه منه كذا إصدار
بس لو هنتكلم عن حاجة زى .. فيرجن 1.4
هنلاقيه بيعرض ريزولوشن لغاية / 7680x4320 .. ما يعادل 8 كي
على تردد 60 هرتز .. تقريباً
و بيعرض ريزولوشن / 3840x2160 .. فور كي
على تردد بيوصل ل 120 هرتز .. تقريباً
و ريزولوشن / 2560x1440 .. تو كي
على تردد بيوصل ل 200 هرتز .. تقريباً
و بيعرض صوت و صورة ، هيطلعلك صوت من الشاشة نفسها لو فيها سماعات
زى ما بنشغل بلاى ستيشن ع التليفزيون كدا و بنسمع صوته .. و هكذا
----------------------------------------------------
بإختصار / لو شغلك ع جودة فل إتش دى .. 1920x1080
و تردد 60 هرتز ... أى نوع كابل من دول هيشتغل معاك
بنفس الجودة و نفس الأداء و مفيش أى مشاكل هتواجهك
لو شغلك ع جودة التو كي .. 2560x1440
و تردد 60 هرتز
خليك ف ال dvi d / hdmi 1.4 / dp 1.4 .. فيما فوق
لو عاوز صوت و صورة ، و أعلى ريزولوشن و هرتز
خليك ف ال dp ، و من بعده ال hd .. بإصداراتهم العالية
حسب المنتشر و المتوفر ليك
و عندك توضيح لطريقة عرض كل كابل ، تقدر من خلالها تفهم
و تختار الأنسب لإحتياجاتك و للجهاز و الشاشة إللى عندك
---------------------------------
مفيش حاجة إسمها كابل ال hd أحسن ف المطلق من ال dvi
و لا إن الديسبلاى بورت أعلي حاجة ف العموم
لكل موديل تفاصيله و مقارنتها ب الموازي ليه
و الموضوع ف الأساس معتمد ع جهازي و شاشتي مواصفاتهم إيه و محتاجلهم إيه
حاجة كمان .. الكابل ف حد ذاته أو المخرج بتاعه
ملهمش أى علاقة بجودة الشاشة و كفائتها .. دول مجرد وصلات مش أكتر
يعنى مش عشان شاشة فيها مخرج hd .. تبقى أفضل من إللى فيها مخرج dvi
جودة الشاشة و كفائتها بيعتمد ع موديلها و المواصفات و نوع البانل
دا لو هنتكلم عن جودة الصورة كـ دقة و ألوان
لكن وجود كابل و مخرج من عدمه مش مؤشر حُكم ع أى شئ إطلاقاً
كمان ف بعض المقاسات من دقة العرض و الهرتز
بتبقي كل الكابلات زي بعض و مفيش فرق بينهم .. زي ما وضحنا
---------------------------------
المقال دا مبسط و عام جداً ، مذكرناش فيه سرعة كل كابل
و لا الإصدارات بالتفصيل و الفرق بينهم ، و لا أى معلومة تقنية كبيرة
لكنه شرح سطحي عشان تقدر تختار بشكل سهل ، و تفهم الزتونة مش أكتر
---------------------------------
لو الكلام عجبك .. لايك و شير
لو معجبكش ، إعتبره من وحي الخيال و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم