إتكلمنا من فترة عن الأجهزة الوورك ستيشن ، إللى هى جزأ من الإستيراد
هتلاقى موضوعين البوست المثبت .. عن الزيون تحديداً
لو حابب تتعمق شوية ف الفئة دي و مهتم بيها
------
و النهاردة هنتكلم عن الأجهزة الإستيراد ، بعيداً عن الوورك ستيشن
لإن الفتي كِتر جداً ف النقطة دي و كله بيتكلم من ورا الشاشة
لا حد فاهم و لا جرب و لا إشتغل ف موديلات و لا أي حاجة
فإحنا هنحسم الجدل دا و هنقولكم الخلاصة من واقع خبرة 10 سنين
دراسة و بحث و شغل سوق و تجارب عملية
لإننا مبنحبش نشوف حاجة غلط ف المجال بتاعنا و نسكت
دا هدفنا الأساسي ف الصفحة .. عمل الشروحات و المواضيع التقنية
و الرد ع أى فتي أو نصب داخل المجال
-------
مبدئياً لو إنت بتبيع إستيراد و مستعمل و فاكر الموضوع دا ليك ، فـ متكملش
و لو إنت بتبيع جديد فقط و فاكر الموضوع دا ليك ، برضو متكملش
من الأخر دا موضوع بيشرح الحقيقة إللي ممكن متخدمش مصالح فئة معينة
فـ لو هنتكلم ماركتنج ، ليكم مطلق الحرية و الإحترام تدافعوا عن البيزنس بتاعكم
بس بعيداً عن التقنية و المعلومات ، مترموهاش ع الصح و الغلط
لكن تقولوا صح و غلط ف المطلق .. منصحكمش إطلاقاً .. لإن دا ملعبي
و الكلام فيه قدامي .. خسارة كبيرة ليكم 🙂
-------
هيا بنا نبدأ الرحلة داخل الأجهزة الإستيراد ـــــــــ
---------
مبدئياً كدا لازم نفهم إن مفيش حاجة إسمها
الإستيراد حلو ف المطلق و لا التجميع حلو ف المطلق
كل شئ نسبي حسب معايير مختلفة ، أهمها الميزانية و الإستخدام
-------
1 - خرافة الأجهزة الإستيراد مش بتقبل تحديث و أدائها ضعيف
و ممكن بنفس سعرها تجيب حاجة أدائها مماثل أو أفضل ...
دا كلام جاهل بلا معني ، لإن كل موديل له تفاصيله و حساباته
التعميم ع فئة كبيرة جداً و مليانة تفاصيل ، شئ مرفوض و غبي
طبيعي إن أى جهاز يقبل جيل أو إتنين زى ما شائع ف الطبيعي
مفيش حاجة بتتحدث طول العمر يعني ، كل حاجة لها جيلها
كمثال / كيسة hp z230 ، أو / جي وان مُعدلة باور
مع معالج أى فايف - جيل رابع
تعالوا نشوف نقدر نطورها إزاي لو حبينا
هنخليها أى سفن ، و هنضيف كارت شاشة بحجم كبير أو 3 مراوح كمان
و نعلي الرام ل 24 جيجا و نحط 4 هاردات .. و نغير الباور كمان
إللى فعلياً يقدر يشغل كروت فئة متوسطة مرتاح جداً
كل دا متاح عادي .. مفيش أى أزمة
و الجهاز بالكامل بيكون مع رام 8 و هارد 500 و باور 400 وات أو 600
بـ أقل من 2700 جنيه ، وقت البوست - و بيقدملك أداء محترم قدام سعره
و دا مش أعلى حاجة كمان ف الأجهزة الإستيراد ، لكنه ملك الفئة المتوسطة
----
الجهاز دا الحل السحري لأى حد عاوز أفضل أداء مقابل فئة سعرية منخفضة
و تقدر تركب معاه أى كارت شاشة حسب ميزانيتك
و الكروت زي ال RX 580 - GTX 1060
هتاخد كل أدائهم و مش هيحصلك أى عنق زجاجة مؤثر
و دا شئ ممتاز و مُرضي جداً مقابل السعر
يعني ممكن ب5000 جنيه مثلاً .. وقت البوست
تجيب جهاز مع كارت شاشة 4 جيجا موديل RX 570
أو كارت gtx 1060 و هتشغل كل جيمز 2019 بأداء ممتاز جداً
هل فيه إختيار جديد أو تجميع بالميزانية دي يديك الأداء دا بقوته و سعره ؟
فكر شوية و إسأل نفسك السؤال دا قبل ما تشتم ف الإستيراد
-------
و لإن مش كل الناس بتحدث الجهاز كل شهرين ثلاثة
و هتكتفى بإمكانيات ضعيفة ع أمل التحديث ، أه موجودين بس مش كتير
لكن الأغلبية عاوزين حاجة قوية ينسوها 3 سنين ع الأقل بدون تحديث
و هنا كل كلامنا ع الإستيراد ف الميزانيات المتوسطة
إللى بعتبرها لغاية 5000 جنيه ، ملهاش شئ يوازيها ف الجديد
و أقصي ميزانية ف وجهة نظرى أقولك تقف عندها و تجيب جديد
و سيبك من الإستيراد ، هي 7000 جنيه ، و دا حسب أسعار السوق حالياً
و قابلة للزيادة أو النقصان حسب تغير سعر التجميعات الجديدة
لكن لغاية قبل الرقم دا ، هات إستيراد عادي جداً
و كل جنيه هتدفعه هيبقى ف مكانه الصحيح و هيديك أداء يستاهل
------
من الأخر متجيش و إنت خبرتك زيرو و ضايع
و لمجرد إن الكيسة فقط مش هتتغير ف تمسك النقطة دي
و تقولي الإستيراد غير قابل للتحديث .. لأ بيتحدث عادي جداً
و زيه زي التجميع مفيش مشكلة
----------
2 - خرافة الأجهزة الإستيراد تهويتها وحشة و بتسخن ...
و دى حاجة تضحك ف حد ذاتها لإن الإستيراد أساساً
بيتضرب بيه المثل ف الحرارة الكويسة و التبريد الأورجنال
و فيه AIR FLOW بالرغم إنه بسيط لكنه مؤثر جداً
و مش هحكي كتير ف النقطة دي لإنها مفروغ منها
------
3 - خرافة الأجهزة الإستيراد هتبوظ معاك بعد وقت قليل و مهلوكة ...
و دى يمكن النقطة إللى فيها ريحة الصح بالرغم من كونها غلط
و دا راجع للتجار معدومين الضمير إللى شغالين ف الفرز التاني
إللى جاي ف كميات بيكون الحلو فيها تايه وسط الوحش و حظك بيقع فيه
كمان ممكن تشتري القطعة و متعطلش معاك ، لكنها تبقى مهلوكة
أدائها مش زي الطبيعي و البنشمارك ، بتسخن بزيادة ، فيها أى مشكلة
-----
و العميل بيفرح بأى توفير ، و بيروح بدون تفكير ع السعر الأرخص
و دي حاجة دايماً بـ ننبه عليها ، متفرحوش بالسعر القليل فقط ف المستعمل
ف حاجات كتير إنت متعرفهاش ، الإستيراد مجال كبير و فيه تفاصيل أكبر
الفرز ، خدمات ما بعد البيع ، المميزات , الضمان و المتابعة
كل دا له تمن ، قدامه قيمة و أداء بتلمسه بنفسك مش خيال
----
عشان كدا الإستيراد سمعته بقت وحشة ، لكنه ف المجمل مش شئ وحش
و عندكم إحنا كمثال و أجهزتنا الإستيراد ، بنطلع عين المستورد ع ما ننقي جهاز
و بنسلم العميل بكل حاجة متسطبة و جاهزة ع التشغيل ، و معموله تيست غشيم
و بنتابع لو حصلك أى مشكلة ، ناقص نيجى نلعب مكانك الجيمز كمان 😃
-------
دا كله كوم و المبالغات و الكلام العجيب بتاع التجار كوم تاني
يقولك أعلى من كور أى سفن جيل زربندح ، و هيشغل جاتا 9000 ع الهاي
و العب بيس 2050 و إنت متطمن ، و ف الأخر هو جهاز طالع عينه
و الكارت إللى بيرفع ل 15 جيجا ، دا قصة تاني
إللى هو لو بيرفع ترامادول مش هيبقي كدا أصلاً 😂
كل الخرافات دي بتسيب أثر عدم الثقة جوا العميل ، و بتخليه يهرب من الإستيراد
--------
4 - خرافة الكيسات صغيرة و باوراتها ضعيفة ...
زى ما وضحنا فوق مش كل الفئات زي بعضها ، و الكلام دا مش عام
يعني مثلا متجيش ع كيسة ب أقل من 1500جنيه
و بتشغل جيمز بشكل كبير ، و تقولي فيها عيوب كحجم و باور
مش منطقي ، و أصلا بأقل من 1500جنيه مفيش حاجة هتديك أدائها
و كلامنا هنا ع حاجة زى hp 6305 - a4 مثلاً
و دا عيب الناس قليلة الخبرة ، إنه يشوفلك موديلات بسيطة أو فيها أى مشكلة
و يقيس عليها فئة كاملة ، و هوبا هيصا الإستيراد وحش
مشافش حاجة مثلا زى أجهزة الوورك ستيشن الحديثة ب رام DDR4
مشافش الفئة المتوسطة فيما تحت زي ال hp z230
و لا شاف حاجة زى ال hp 600 g1 ، و النوعيات دي كلها
----------
إحنا كان عندنا ف الإستور أجهزة تجميع جديدة ، أجيال حديثة
سعرها أقل من 6000 جنيه ، و معاها كارت شاشة خارجي كمان
لكن ف عملاء كتير بيفضلوا الإستيراد عليها لإن كارته هيكون أقوي
و بيدفعوا نفس المبلغ بتاع الجديد ف جهاز إستيراد أقوي
لإنهم مبيبقاش عندهم أى نية للتحديث ، و دا بيبقى بكامل إرادتهم و عن فِهم
و ف النهاية هما أدرى بظروفهم و إحتياجاتهم
و إحنا بننبه الكل و بنوجه للصح
لما نلاقي حد ماشي بأفكار غلط و رايح ناحية شئ هيضره أياً كان
-------
من الأخر دي مش دعوة لشراء الإستيراد و لا لـ حُبه
لإني كاتب فوق حالات متشتريهوش فيها
و أنا مبرشحوش إلا لما أعرف إمكانيات العميل بشكل عام و ظروفه فيما بعد
لكن المقال دا توضيح لمعلومات غلط كتير بتتقال بلا فِهم
و لإننا بنراعي ربنا و عندنا رسالة معينة
فواجب علينا نفهمك عيوب و مزايا كل شئ
و ليك حرية الإختيار بعدها
-------
مش هيجيلي عميل معاه ألفين و عاوز يلعب
أقوله إمشي روح حوش و تعالى هات جديد يا فقير !
مش هيجيلي عميل أخره 3000 أو 5000 جنيه و عاوز يشغل كل جيمز السنة
و أقوله سوري مش من حقك تلعب
إشتري جديد فقط ، و لو مش معاك روح موت !
دا كلام مش منطقي و لازم حضرتك توجدله بديل يا إما متتكلمش
------
كلمة بخصوص المولات ، سواء البستان أو سوق العصر
و كمان التجار إللى شغالين برا المول و محسوبين ع المجال
فيه نصابين كتير ، أهـ .. فيه عربجية كتير ، أهـ
فيه ناس جاهلة و مش متخصصة ف المجال ، أهـ
فيه ناس محترمة و فاهمة كتير ، برضو أهـ
كل مكان ف الدنيا دى فيه كل الأشكال
و دايماً الحلو قليل لإننا مش ف جنة
إحنا ف دنيا و هنقابل كل النوعيات
فـ دى مش مشكلة المول و لا المجال و ناسه
دا شئ طبيعى جداً و بيحصل ف كل مكان و كل مجال
خلينا منتحاملش أوي ع المول و لا ع المجال بشكل عام
و ندور ع الحلو وسط الوحش .. و نختار بحرص شديد
-------
كلمة أخيرة لعزيزي الفتاي خلف الشاشة ال / إل سي دية 😃
قبل ما تعيب ع سعر منتج أو فئته .. أو حتي تنقده
هاتلنا البديل إللى بترشحه و يوازي المنتج ك سعر
و أدائه أحسن و أقوى ف المجمل عشان كلامك يكون مبني ع أساس
الموضوع لازمله مقارنة حاجة قدام حاجة بشكل واضح
كمان ناقش العيوب و فصلها ، و إتأكد إنها أصلاً عيوب
مينفعش تقعد تهري بلا حُجة و دليل قوي ع كلامك
لإن كدا كل إللى بتقوله هيكون بلا قيمة
و لو هتردد النغمة الرخيصة بتاعة مشاكل الإستيراد و هيبوظ بعد سنة
ممكن أجيبلك سكرينز لأجهزة جديدة بمبالغ كبيرة ، و مفروض إنها بضمان محلي
و المحل أو الوكيل مدوخين العميل عشان يصلحوله إللي باظ
يعني لا ضمان أبدي ، و لا الجديد مش بيبوظ أهو !
و عشان كدا بنقول دايماً إن أى قطعة إلكترونية معرضة للتلف عادي جداً
دي مش مشكلة جديد أو مستعمل ، دا أمر شائع جداً ف المجال
------
من الطبيعي جداً إن لو الإمكانيات متوازية أو فرقها بسيط
فـ الجديد أحسن جداً و بننصح بيه ، كفائة و دعم و يكفي إنك أول إستخدام
حضرتك لما بتقول الجديد أفضل دا مش إختراع يعني و لا شئ غريب
إحنا فاهمين كل دا ، و بنمنع ناس تشتري إستيراد ف حالات معينة
بس لكل مقام مقال ، إحنا عندنا فئات كتير لازم نوفرها حلول
إنت بتعمم بدون وعي ، إنت مش فاهم متطلبات السوق
إنت مش بتقدم بديل و بتستهدف فئة معينة فقط
فـ دا غير مقبول أكيد ، و عدم خبرة كبيرة منك
------
متستغلش صورة غلط منتشرة و تبني عليها كلامك و تضلل الناس
عشان تلم تفاعل زائف من أى حد بيحب يهاجم و بس يبقى ف صفك
أو عشان تجامل الشركات إللى مأجرينك بـ الساعة
إرتقي و إحترم العقول الواعية و متبوظش العقول إللى بتحاول تكون واعية
أسهل حاجة إنك تنقد و تطلع الدنيا كلها وحشة
لكن الصعب هو إنك تشوف الحاجة الكويسة و تظهرها
و الأصعب و الأصعب إنك تبقى راجل بمعناها 😉
مش مجرد كائن بيلهث ورا عضمة متجاهل الحرام و الحلال و الأخلاق
تحت مسمى لقمة العيش ــــــــــ
--------
لو الكلام عجبك لايك و شير
لو معجبكش إعتبره من وحي الخيال ، و لا يمت للواقع بـ صلة
و لايك و شير برضو ، متبقاش غلس 😍
تعليقات
إرسال تعليق
سيب أستفسارك وهرد عليك يانجم