بخصوص بوست الكراك و بيع الداتا المكركة ، حلال أم حرام /
حابب أقفله بـ البوست دا
عشان نكمل ف مواضيعنا الجميلة كالعادة 😃
----
بالرغم إني عرضت كل التفاصيل ، و وضحت ف البداية
إني مش جهة تشريع ، و إنك فيك عقل و لازم تفكر ف كل شئ
و قلت إن كل كلامي ليس حقيقة مطلقة لكنه إجتهاد و رأي شخصي
ناس كتير قالتلي الحرام و الحلال مفيهمش وجهات نظر
و هما أصلاً مش فاهمين إن أصل وجهات النظر ف التحليل و التحريم
طالما الأمر جدلي و مفيهوش دليل قاطع مٌثبت
دا لا موضوع عقائدي و لا أمر مُسلم بيه و فيه أحكام قاطعة
فـ طبيعي يكون فيه نقاش و وجهات نظر
كمان وضحت كل الأراء ، النقطة إللي متفهمتش و إتسمت تناقض
لكن القصد إني كنت بتكلم من كذا زاوية و بكذا لسان ف البوست
عشان أرد ع الحُجة و عكسها مش أكتر
----
البوست فيه ردود بتبين العقليات إللي عايشة وسطنا
فهم الناس للدين و النقاش بشكل عام ، شئ مؤسف
الموضوع طلع برا إطار العلم و الإستفادة أو حتى الإحترام
و دخل سكك غريبة ، الردود كتير منها مؤسف
أغلبية الردود تتقسم لـ الأنواع دي ...
النوع الأول / دا مؤيد لـ كلامي ، سواء بالإقتناع الكامل
أو بالتضامن كـ منطق ، لكنه تايه مش عارف يرسى دينياً
فـ بيحاول يحسس ع الطريق و يمشي تبع ما قلبه هيرتضي
و دا باحث عن الحقيقة ، ميتخافش عليه و ف الأغلب هيوصل
لإنه بدأ صح و مشي بتفتيح دماغه و فهم الأمور بـ هدوء
و الدين مش بعيد إطلاقاً عن العلم و المنطق
-----
النوع التاني / المرضى النفسيين
مجموعة كدا غريبة ، داخلين يشتموا و بس
لا بيتناقشوا ، و لا بيقولوا أي حُجة أو دليل ، و لا أي شئ
هو بس داخل يشتمك و يقل أدبه و طالع
لإنه بيتحلى بأخلاق الدين الإسلامي الحميدة
فـ يدخل يسبك إنت و عيلتك لإنه معترض ع شئ حرام بتعمله
شيزوفرنيا عارفينها و شفناها قبل كدا ، دول إترزعوا البان الجميل
و حاولوا يدخلوا يشتموا بـ كذا أكونت تاني ، و برضو خدوا بان
فـ مش هنشغل بالنا بيهم
-----
النوع التالت .. دا إللي عليه الحوار كله ، و إللي خلاني أتصدم
أنبياء 2020 ، رُسل عصر الـ 5G ، أصحاب الحُجة و الحقيقة المطلقة
زي ما عاوز تقول عليهم قول ، هما مخلوقات ملائكية نورانية أصلاً
الوصف دا ميجيش 1% من حقيقتهم الرائعة
الناس إللي داخلة بـ الأيات جاهزة كوبي ، و إلزق أي تفسير ف أي موضع
و إدعي ربنا يغفرلك يا شهاب ، و الأحكام الجاهزة تتحط عليك فوراً
و إتهامات بنشر الفسق و الفجور و المعصية 🙁
النوع الرابع هنذكره أخر البوست ، لإنه يستحق شكر خاص 😃
-----
إيـــــــــــــــه !
إنتوا يا جدعان فاهمين الدين غلط ، و بتخلونا أضحوكة
دا أنا مشفتش حد فيكم بيقول ( الله أعلم ) ف أخر كلامه
محدش قال دا رأيي و قناعاتي بـ ديني و ضميري
زي ما أنا عملت فوق عشان مشيلش أي وذر للتأكيد ع شئ
كلكم ماشاء الله عاملتوا الكراك و تداوله كأنها مسألة منتهية
و ليس عليها أي جدل ف القرءان ، كأنه حكم مُثبت و واضح
كأن ف نصوص لا غبار عليها تؤكد حرمانيته
زي شرب الخمر كدا ، أو الزنا ، الموضوع خلصان يا شقيق 😃
بالرغم أصلاً من إن حتى المسائل المنتهية
بيبقى أحياناً ليها مواضع ممكن تتخالف فيها
لسبب معين و بضوابط معينة ، و دا نادراً لكنه بيحصل لضرورات
ما بالك بحكم جدلي خلافي شائك فيه أراء كتير و يحتاج مجالس علم
و مش هيتحسم أبداً لإنه هيظل فيه إختلاف و أراء
و دا عادي جداً ، لإن ف إختلافنا رحمة ، و كل واحد مرهون بـ نيته
دا الأئمة الأربعة إختلفوا ف أمور مش بسيطة
----
400 كومنت أغلبهم مصادر تشريع و جهات فتوى لا تخطئ !!!
دا ديار الفتوى بإختلافها لما بتصدر أي حكم ناتج عن مباحثات طويلة
بتقول ف النهاية إن دا رأيها الخاص بـ جهتها ، و الله أعلم ف النهاية
أنا مش فاهم الحقيقة ، هل الجهل وصل للدرجة دي !
و لا دا محاولة إظهار إننا مسلمين و غيورين ع الدين أووووفر !
هل إحنا كدا مسلمين و بتصرفاتكم دي نصرتوا الإسلام ؟
مع إن نفس الشخص إللي داخل بيقول لي الكراك حرام
هو نفسه إللي سبني أنا و اهلي و هو بينصحني معملش الحرام !
حضرتك دا كدا إسمه إرهـ-اب ، مش إسلام و لا موعظة حسنة 🙁
-----
الناس محسسني إنك عملت كارثة كونية كبيرة لإستخدامك الكراك
و خلاص المدينة الفاضلة ملوثة بمستخدمين الكراكات فقط !
و محدش فاهم أي شئ ، و شغالين رزع فتاوي ضعيفة غير مكتملة
و لا نقدر نعتبرها مقياس لـ شئ
و ماشيين وراها و خلاص
و يقولك إنت بتدعمهم بزيارات و إعلانات و بتساهم ف الإختراق !
ميعرفوش إن الموضوع إقتصادي و فيه حروب بين الشركات نفسها
و المخترقين دول دايماً بيحققوا أهداف معينة لمصالح كبيرة
و فيه محاولة لتوازنات إقتصادية و إبتزاز و قصة كبيرة جداً
و أخر هام ليهم هو إستفادة حضرتك بـ الكراك أصلاً
ولا يفرقلهم و لا هيضرهم بالشكل إللي إنت متخيله
إحنا أصغر حلقة ف لعبتهم إللي بتحصل دي
و وسط كل دا ، بنتخانق هنا و نحرم العيشة ع بعض !!!
مش عارف أقولكم إيه الحقيقة 🙁
-------
يا جماعة موضوعنا شائك و لازم حد من متخصصين المجال التكنولوجي
يخش فيه كـ مرجعية و سند مع رجال الدين عشان يشرحلهم
عشان كدا أنا عملته و بحاول أشرحه بكافة السبل
الموضوع مش بالبساطة و السطحية إللي فاكرينها دي
و لا الفتاوي إللي بتحطوها و خلاص هي الحل ، وسعوا الأفق بتاعكم
رجل الدين متخصص بالدين فقط و ميدراش شئ عن مجالنا و حيثياته
إذا كان أغلبكم جمهور تكنولوجيا و مش عارف نقاط كتيرة
ما بالك بـ رجل دين بعيد كل البعد عن المجال
-------
ف كلام غير مباشر متفهمش ف البوست ، أنصحكم بالقراية بتركيز
مُلخصه ، إن كل الناس إللي قالت حرام ، علمهم محدود دينياً
لإنهم لو يفهموا الدين كويس ، و دارسين فقه و سيرة و علوم شرعية
هيعرفوا إن مطلوب منهم أصلاً يستخدموا الكراك 🙂
و تقدر تبحث بدقة و تركيز ، بدون تعصب
و هتلاقي كلامي بيوضحلك حاجات أول مرة تعرفها ف حياتك
و كل لبيب بالإشارة يفهم ...
----
عشان الناس إللي قالت بتبرر لنفسك و الكلام الأهبل دا !!!
حضرتك مش حابسني و لا أنا محتاج أجلب تعاطف حد
و لا محتاج شئ يبرر لي فعل ، أو يخليني أعمل أي حاجة
إللي بيعمل الغلط بيعمله و هو عارف إنه غلط
و إللي بيعمل الصح بيبقى ثابت مهما الدنيا إتغيرت حواليه
و حتى لو جاله ألف واحد نصحوه إنه غلط أو إنه صح
محدش مستني حد يزقه ، لإن ضميره إرتضى الشئ خلاص
عندك كلمة حلوة و ليها أساس إتفضل قولها عسى ربنا يهدي بيك حد
معندكش ، لتقل خيراً أو لتصمت ، هو دا أصل الدين بتاعنا
الأمر بالمعروف و النهي عن المنكر ، إنتوا فاهمينه غلط خالص للأسف
القصد من البوست كان غير كدا ، بس ع نواياكم ترزقون
-----
الكلام و الموضوع من البداية مش ديني فقط تحديداً
لكن ف أمور بتبقى مرتبطة ببعضها ، فـ الشئ بـ الشئ يُذكر
القصد كان نقاش منطقي من ناس مثقفة و متعلمة
نقاش راقي و متحضر يثبت الحُجة و يفيدنا كلنا و يفتحلنا أفاق
دي الإستفادة الحقيقية من النقاشات و من النت عموماً
تبادل الخبرات و العلم ...
لكن للأسف الموضوع إتحول لـ سب و إتهامات بالفسق
و محاولة إثبات من يحمي الإسلام أكتر ، و بلا بلا بلا كتير أوي
كل دا بيعكس تعليم و تربية جمهور السوشال ميديا
مشهد أي حد يشوفه ميتمناش يبقى ضمن المجتمع دا
-----
تحية للناس إللي رغم إعتراضهم ع كلامي
ناقشوا بمنطق و أخدوا بالهم من الوقوع ف غلط ديني أو أدبي
دول النوع الرابع ف الكومنتات
التفاعل ع البوست بـ الموافقة كان أكبر من الرفض
حوالي 85% مؤيد ، و 15% معترض ع الكلام
و معدل الكومنتات الإيجابية برضو مش قليل
كتير أصحاب عقول واعية شرحوا رأيهم بإحترام حتى لو مختلف
النسبة عظيمة ، الأمل فيكم ♥
------
ف النهاية ، كلامي مش حقيقة مطلقة
وارد جداً أكون غلطان ، دا مجرد رأي خاص
أنا مش مرجع تاريخي و لا دار علم ، مفروض عليك كلامها
عقلك ف راسك و إبحث ، و الحكم النهائي ضميرك
----
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم