الألعاب و البرامج المكركة ، حلال أستخدمها ولا حرام !
و بيع الجيمز و الداتا ، حقي و لا نصب ع الناس !
------
الموضوع دا نتاج دراسة و تصالح مع النفس و إقتناع
بدون أي مصلحة شخصية أو غرض أخر
الكلام يعبر عن وجهة نظر خاصة
لا أنا جهة فتوى ، و لا كلامي لازم يكون صواب
رأيي مش فرض ع أي حد ، و لا هو إثبات لـ حقيقة مطلقة
كل شخص حر ف ما يعتقد
للكل الحق ف البحث ، و إنه يقول رأيه بـ منطق و حُجة
طالما مفيش تطرق لأمور عقائدية و مٌسلمات
أو حتى ثوابت و نصوص صريحة
متعملنيش شماعة لإقتناعك بشئ ، و لا تتهمني بنشر الحرام
إنت مربوط بـ نيتك و ضميرك ، و أنا مربوط بـ نيتي و ضميري
و ربنا خلق لنا عقل نفكر بيه ف كل حاجة ، محدش بيجبر حد ع شئ
و كامل الإحترام لجميع وجهات النظر إللي أتمناها مفيدة ليا و للكل
مش مجرد شتيمة و جدل أعمى و خلاص ...
-----------
مبدئياً كدا ، كلمة حرام مطاطية جداً ف إستخداماتها
بالرغم من إن الحلال بَيِن و الحرام بَيِن
لكن الكلمة ليها تأويلات كتير ع حسب المواقف
و مع إختلاف العقليات و رضا و قناعة كل واحد شخصياً
يتبقى ضميرك فقط ، هو الحكم النهائي
ف خلينا نبعد عن الحلال و الحرام كـ مصطلح
و نتكلم بـ المنطق فقط
و المنطق السليم هيودينا للحلال المُجرد
أو الحرام المُجرد ف النهاية
------
أولاً .. الكراك /
أول نوع هنلاقيه بيقول حرام تحميل الألعاب و البرامج المكركة
هما أصحاب الكونسولز زي الإكسبوكس و البلاي ستيشن
أو الناس إللي بتشتري جيمز أونلاين كتير ع الكمبيوتر
دول بيحاولوا يحللوا المبالغ الضخمة إللي بيدفعوها
و يحسوا بإنتصار ذاتي ليهم ، مجرد شئ نفسي عندهم مش أكتر
و هما مش فاهمين أي حاجة ف موضوع الكراك و نقل الداتا
بس كل القصة إللي هو إحنا أحسن منكم و بتاع
و كمان دا الطبيعي إننا ندفع فلوس ف الجيمز
إحنا مش مغفلين ، إنتوا إللي حرامية !
هـ نسيبنا منهم ، مش هنبقى إحنا و أسعار الجيمز عليهم 😃
------
تاني نوع ، هما فئة المرتزقة إللي ياما حذرنا منهم ، البروموترز
و لإنهم ميقدروش يقولوا حرف خارج النص المفروض عليهم
فـ طبعاً مفيش شركة سواء لـ هارد وير أو سوفت وير ، هتشجع الكراك
لإنه هيأثر ع مبيعاتهم و تعاونهم مع الشركات التانية
و بالتالي البروموترز هيقولوا سمعاً و طاعة بدون تفكير كالعادة
هيمشوا وراهم و هيدعموا تجارتهم بكل الأشكال
فـ طبعاً دول فئة مش موثوقة و كلامهم مبناخدش بيه ف أي شئ
----
تالت نوع ، هما فئة الرقص ع السلالم ، دول بصراحة مضحكين جداً
إللي هو يبقى شغال ع وندوز متكرك ، و كل برامجه متكركة
و بعض الجيمز إللي عنده ممكن تكون متكركة
و ييجي يهاجم الكراك ، و يقولك أنا أه شغال بـ كراك بس أنا ضده !
حاجة كدا زي قتلت و إتقتلت ف نفس الوقت 😃
و يفضل يوديك الحلزونة و يقولك حرام تسرق مجهود ناس و بتاع
و أنا حرامي أه بس من جوايا معترف إنه غلط و نفسي أبطل
بس مش قادر يا عمو 😃 و حاجات عجيبة كدا
دا نوع محتاج جرعة رجولة شوية عشان ينشف و يتكلم صح
برضو هنسيبنا منه و مش هنسمعه
ما طبعاً ف الأخر هتسيبك من كله و تخليك معايا
عيب عليك أنا مش هغشك يا بورينس 😃
-----
خلينا نتكلم كـ فنيين و خبراء ، و كإنصاف ف صلب الموضوع
طبيعي إن أي حد يزعل من سرقة مجهوده أو ضياعه
و الجيمز و البرامج دي بيطورها شركات فيها موظفين بالألاف
و هو دا مصدر رزقهم و بيتعبوا فيه و لازم ياخدوا حقهم ف النهاية
و محدش يقدر ينكر دا ، الجزئية دى مفروغ منها
----
طب تعالوا نبص ع الموضوع من الزاوية التانية
هل أنا بشارك أو بدعم أو بساهم بـ أي شئ و لو بسيط
ف عمليات الإختراق و خسارة الشركات لـ فلوس ف الموضوع دا ؟
الإجابة ، أبسولتلي لأ ، و لا ليا دعوة يا عمو و ربنا 😃
------
الجيمز أو البرامج دي بتبقى معروضة ع النت تحميل مجانى !
يعنى أنا مبدخلش أخترق موقع أو أدمر تجارة شركة و أسرقها بنفسي
و بـ تحميلي ليها أو عدمه ، هي أمر واقع موجودة للأبد و متاحة للكل !
أنا لا بساعد فريق الكراك ، ولا بدعمه بـ فلوس و لا بـ أي شئ
ولا عدم تحميلي لـ كراكهم هيرجع لـ الشركة حقها و هيوقفهم عن التكريك
يعنى دا لبن مسكوب و البكاء عليه مش هيفرق شئ ف رجوعه
ييجي أخينا المحنك هناك يقولي يعني لو حاجة مسروقة
و ف الشارع قدامك هتروح تاخد منها و تقول حلال !
هرد عليه و أقوله / مثلك مش ف محله يا فندم
لإن أولاً السلعة هنا إفتراضية ، سوفت وير ، هواء !
مش حاجة ملموسة ليها صاحب و لا مسروقة بالمعنى الحرفي لـ اللفظ
+ إنها لو ف الشارع و معروف إنها مسروقة هنحاول نردها لـ صاحبها
لكن هنا بعد الإختراق ، السلعة بتبقى مشاع ، مفيش أمل لـ رجوعها أبداً
وصف السلعة بـ الهواء هنا للتشبيه بالإنتشار
و للرد ع المثل ف الأمل ف رجوعها لصاحبها
مش لإنها ملهاش قيمة أو أي شئ يخصها
-----
ف بلد زي مصر لما يبقى سعر أرخص لعبة بينزل عليها أكبر خصم
ما بين 100 لـ 200 جنيه ، و الباقي واصل لـ 1000 جنيه كـ مثال
ف نفس الوقت إللي الناس نفسها تجيب فيه جهاز و بتقف ع 500 جنيه
يبقى قمة الحرام فعلاً إنك تتجاهل الظروف المعيشية و حال البلد
و تروح تدفعهم ف مجرد جيم هتلعبها أياً كانت قيمتها !
الوندوز لما نزل من فترة ما بين 100 و 200 جنيه
ناس كتير راحتله و بقت تفضله كـ نسخة أورجنال و تدفع فيه فلوس
لإن السعر كان كويس نوعاً ما ، و المنتج نفسه يستاهل الدفع
و دي نقطة مهمة جداً تبينلك الموضوع من زاوية أوسع
و هي الإحتياج ، و القيمة مقابل السعر
----
فوائد الكراك /
تحميلى لعبه متكركة هيفيد شركتها مش هيضرها
تعالى أشرحلك إزاى !
1 - النت إللى بحمل منه بدفعله فلوس إشتراك
و دا بيفيد كل الشركات إللى بستخدم مواقعهم
----
2 - الجهاز إللي بلعب عليه بيحتاج تطوير و بشتريله هاردوير
عشان يشغل الألعاب الحديثة ، و أغلب شركات الهاردوير
بتبقى عاملة شراكة ف حاجات معينة مع شركات الجيمز
فـ بالتالى شرائي لـ هاردوير هيعود ع شركات الجيمز بـ النفع
بأشكال مباشرة و غير مباشرة
----
3 - لو اللعبة عجبتنى أوي بتكلم عنها و أقول للناس عليها
و كمان ممكن أنزلها ريفيو ، و كتير ممكن يشتريها
و دى دعاية مجانية ، و بتزود فرص مبيعات اللعبة
و لكم ف الترندات عبرة
---------
4 - لو عاوز ألعب أونلاين ، بدفع للشركة عشان أشتري اللعبة
لإن مفيش كراك أونلاين لـ أي لعبة
و حتى لو فيه ، فـ بيبقى ع نسبة لا تذكر من الجيمز
يبقى كدا الشركة إستفادت مني و إشتريت
بس بعد تجربة العينة المجانية إللي هي ( المتكركة )
--------
كل دي إستفادات كبيرة جداً ، و زي ما وضحت ف الجزء إللي فات
حتى لو مفيش أي إفادة ، و إنت مش هتعترف ب الكلام دا
فـ أنا مضرتش الشركة و لا ساهمت ف أي مشكلة حصلت معاهم
---------
كمان لو حضرتك هامك الحرام و الحلال بشكل بشع كدا
و بتحاول تنصر الدين بكل الطرق ، فـ إنت تعرف إن الشركات دي
أغلبها بيناصر دول إستعمارية ، و لهم إستثمارات كبيرة خلالهم
يعني بشرائك الألعاب دي فـ إنت بتساعد ف أذية إنسان تاني
أياً كانت ديانته أو ملته ، الإستعمار واحد و مؤذي ع الجميع
و برضو عشان الأخ المحنك إللي هييجي و يقولي
مش حلال علينا برضو إننا نسرق حتى المستعمر
هقوله كلامك صح ف بعض المواضع بدون دخول ف تفاصيل
فـ إقرا الجزأ إللي فوق إللي موضح فيه إننا لا ساهمنا و لا سرقنا 🙂
مش من حقنا و ضد الإنسانية إننا نأذي حد مأذاناش
لكننا بنتصدى لـ ضرر معين ، بشئ إيجابي معنوي مش أكتر
بدون أي مواجهات مباشرة أو عنف ، لكن أضعف الإيمان
---------
بإختصار /
إحنا مجرد أشخاص بنعيش ف بلد فقيرة و بنحاول الإستفادة الحلال
بكل الأشياء المعروضة ع المشاع مجاناً ، بدون أذية أو ضرر شخصي مباشر
------
بخصوص الكلام إللي بيتقال إن بيع الجيمز و الداتا حرام /
سواء من إللى عاوزين يحملوا جيمز ببلاش و مش عارفين
و دي فئة مريضة نفسياً بجد
بيبصولك ف كل شئ ، و يقولك خد تمن الداتا مرة واحدة
و بعدين إفتحها سبيل و مجاناً ، إنت ليه عاوز تكسب كل مرة !
عارف إنت ، بصوت اللمبي ، إنت مال أمك 😃
-----
و برضو أصحاب الكونسولز إللي بيدفعوا كتير عشان يشتروا لعبة واحدة
طبيعي يبصوا لـ إللي بياخد 100 لعبة بـ تمن لعبة واحدة
إنه حرامي مثلاً ! مش عشان هو بيسرق ، أبسولتلي !
لأ ، دا عشان يحسسوا نفسهم بـ الرضا عن دفع الفلوس دي كلها
و عشان يبقوا متميزين عن الباقيين ، دا أنا بشتري أورجنال يا حقير 😃
فـ هيطلعك إنت حرامي ، و إللي بيبيعلك الجيمز نصاب ، سهلة خالص
-----
و سبحان الله ، ف حاجة غريبة جداً ف الناس دي
يسموك نصاب لمجرد مثلاً إنك بـ تبيع جيمز بـ أي سعر كان
و يروحوا عادي جداً يشتروا سيريال أو إسطوانة كونسول ب ألف جنيه
و دا أصلاً أكتر من سعر 200 لعبة متكركة تقريباً !!!
و الإبتسامة البلهاء عليهم ، و يقولك لعبة أصلية و بتاع !
يعنى مشكلتك مش فلوس إطلاقاً
مشكلتك مبقتش إستغلال ف الأسعار تحديداً !
مع إنك مسألتش نفسك و لا هتسأل ؟
هل فعلاً إسطوانة الكونسول تستحق المبلغ دا !
هل مجرد سيريال لعبة يستحق توصل لـ 1500 جنيه ف بعض الاوقات !
محدش بيفكر ف كدا إطلاقاً ، و بند الاستغلال منسي ف الحالة دي
و كأنها سلعة حقيقية تستاهل كل الارقام دي و حلال !!!
مشكلتهم فقط الطريقة نفسها ، متكرك ، يبقى رِجس من عمل الشيطان 😃
-----
طيب أنا ليه باخد فلوس من الناس مقابل بيع ألعاب ليهم
مع إنها متكركة و مجانية ع النت !
1 - بدفع إشتراك نت مقابل الحاجات إللي بحملها
هي أها مجانية ، لكن التحميل ف حد ذاته بـ فلوس و باقات غالية
2 - لإني بدفع كهرباء للجهاز مقابل شغله دا
و لازم تحاسب ع وقت التحميل إللي هتستهلكه
3 - هعطل نفسى و شغلي ع الجهاز ، أي مدة حسب النقل
4 - بقعد أسطب اللعبة و أظبط ملفاتها و أجربها
بعد ما أحملها من مواقع سليمة بدون أي فيروسات
و أخيراً أجهزها للتشغيل مباشرةً ، و دي خطوات بتاخد وقت و مجهود
------
بخصوص الأخ المحنك إللي ورايا ف البوست كله دا 😃
و بيقول ما إنت كسبت مرة مش هتفضل تبيعها
ما الداتا كدا كدا موجودة عندك ، ليه بتاخد فلوس كل مرة
الموضوع مضحك بس للأسف ف ناس بتفكر كدا و بتقول كدا
مثال بسيط ، هل السواق بعد ما يجيب تمن عربيته
مش بياخد أجرة من الناس و بيبقى خلاص كدا كسب إللي دفعه
هل الحلاق بياخد من أول عميل بس تمن الحلاقة
و الباقيين بيحلقلهم مجاناً ، لإنه خلاص جاب تمن المقص و المكنة !
الموضوع بديهي ، دي تجارة و بيزنس ، و كل مرة فيهم تعب مقابل الربح
النقل مع كل عميل بيستهلك وقت و بيعطل شغلك ع الجهاز
و لازم تبقى متابع كل الجديد و بتصرف دايماً عشان تحدث الداتا بتاعتك
فـ الإستمرارية ف الربح شئ عادي جداً و منطقي
لإن العملية بالكامل مستمرة من الناحية التانية
-------
من الأخر /
إنت حر تشتري بـ مليون جنيه أي إسطوانة كونسول أو سيريال
بس متقولش ع الناس حرامية لمجرد إحساسك بذاتك
و تبرير لفلوسك الكتير إللى بتدفعها
و برضو إنت حر يا فندم إنك متدفعش جنيه ف الجيمز و تنقلها فري
من الناس ف تجمعات ، أو من حد فاضي و بيحمل مجاني
بس متقولش ع الناس نصابين و حرامية
لمجرد إنك مش عاوز تدفع ليهم حقهم و تقضيها برشطة
أو حتى عاوز تحددلهم سعر ع مزاجك كأنه تعريفة ثابتة !
------
هعيش أنا دور الرجل المحنك المرة دي 😃
ممكن برضو ب حسبة العقول المضروبة
أنقل لك الجيم بدون كراك ، داتا فقط !
و أقولك روح إنت نزلها كراك عشان مقعش أنا ف حرمانية
و دا المعنى المطاطي للحرام إللي شرحته ف الأول
إللي الكل بيلف وراه بدون ما يشغل عقله
هل وقتها هبقى نقلت جيم متكركة فيها شبهة ، لا إطلاقاً !
هبقى نقلتلك داتا عادية ، تستخدمها كـ أورجنال ، تستخدمها بـ كراك
مسئوليتك إنت بأه يا صديكي
الجزئية دي لمحبي البعد عن الشبهات البسيطة حتى 🙂
و دا تحايل رخيص ، و أنا عشان صريح مع نفسي مش بعمله
إللي بيعمل كدا هو نفس الشخص بالظبط بتاع التقسيط
إللي بيقولك إنه حرام أديك فلوس ف إيدك ، لكني هديك سلعة !
كلها تحايلات ع الحلال و الحرام ، بدون تحكيم العقل و الضمير
----
ف النهاية ، أي حد يقولكم الكراك حرام ، أو بيع الجيمز حرام
ردوا عليه بـ كلمتين بس / (( #اقفش_زومبي )) 😎
--------
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت للواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم