كنت حابب أتكلم عن الموضوع دا من فترة طويلة
بس كنت مستني أكتبه بـ روقان
سؤال معتاد بيتكرر كتير ، إيه أحسن شركة نجيب منها القطع ؟
الكلام هيكون داخل مصر ، بحكم إني من قلبي و روحي مصري 😁
أعتقد الحال برا هيكون مختلف كلياً و وارد الأية تنقلب تماماً
بس خلينا ف المحلي دلوقتي
الكلام ع تعامل الوكلاء و التسعير و شوية حاجات كدا
مش ع جودة او ترشيح ف المطلق
لإن الـ 3 شركات ممتازين و التفوق متفاوت للقطع حسب الموديل
------
طبعاً ف التجميع عادي تجيب كل قطعة من شركة
مثلاً الكارت من إسوس ، و البوردة من إم إس أي ، و الرام من أورس
و هكذا ف كل شئ ، و دي من مميزات التجميع
بس ف ناس كتير و أنا منهم ، بنحب نوحد الجهاز كـ ماركات
يعني نخلي كله نفس البراند بقدر الإمكان
ساعات بتاخد مزايا ف الإضائة و الدعم
و ساعات و لا بتحس بأي شئ و بيبقى بلح 😃
لكنها راحة نفسية ، و إحساس بالتوافق مش أكتر
----
بس لما نروح نجمع بأه ، هنلاقي المفاجئة 🙁
عندنا ف مصر مشاكل كتير جداً ف التوكيلات و أصحابها
بعيداً عن عقليتهم ف التكنولوجيا بشكل عام
زي ما وضحت قبل كدا ، السوق أغلبه زومبي
و حتى الأن مشفتش وكيل أو موزع ف مصر أثبت إنه مختلف
سواء بعقليته و إدارته ، أو مواقفه وقت الأزمات
أو بـ الشركاء إللي بيتعامل معاهم ف الدعاية ليه بشكل عام
كلهم للأسف دون المستوى ، و مش واجهة لـ تمثيل كياناتهم
هما شغالين لإنهم الوحيدين ، مش لإنهم بيقدموا أي شئ مميز
----
و دا رأيي إللي كنت مأجله من شهور وقت أزمة التوكيلات
و مرضتش أتسرع مع الكل و أزيط وقتها ، لكني صبرت
و قربت من كذا شخص سواء الوكلاء أو الموزعين
بشكل مباشر أو غير مباشر ، و إتصدمت بصراحة 🙁
و دي مشكلة ف كل المجالات للأسف ، مش التكنولوجي فقط
لإنها مشكلة مجتمع و بلد أغلبه مش مثقف و لا واعي كفاية
بس خلينا نتكلم عن الكويس ، لعل و عسى نشوف تغيير ف يوم
-----
هذكر 3 شركات فقط ، مع العلم إنهم مش الوحيدين
لكنهم الأكثر إنتشاراً ، و هعلق ع جزئيات محددة
-----
1 - شركة جيجا بايت - فئة أورس تحديداً - بالونة الهواء
دي تعتبر الستاندرد بتاع الهاردوير
زي توشيبا العربي ف الأجهزة المنزلية 😃
مهما كان ف براندات و موديلات أعلى منها
لكنها ف وجدان المصري الأصيل ليها مكانة خاصة و ثقة غريبة
و دا عن إستحقاق بصراحة ، بس لغاية 5 سنين فاتوا تقريباً !
-----
لكن مؤخراً إبتدي الهزيان كله
بدايةً من تسعير سئ جداً فيه إستغلال للطلب
و ملوش أي علاقة بـ مؤشرات السعر العالمي و لا بـ الشركات المنافسة
السوق محتاج ، يبقى نرفع السعر براحتنا ، و غصب عنهم هيشتروا !
و دي سياسة رخيصة و غلط جداً !
و كتير بنلاقي منتجات سعرها العالمي مع مثيلها من براند تاني واحد
لكنها ف مصر متسعرة بشكل أغلى و مبالغ فيه لـ جيجا بايت ، بدون مبرر !
زي كروت الشاشة و البورد ، الفترة دي
------
أما اللعبة الذكية منهم فـ هي الفئات الاقتصادية فيما تحت
البوردات ال M و الكروت المتوسطة و المنخفضة .. إلــخ
كل دا بينزل بـ سعر رخيص و مُنافس ف السوق
بحيث يعملوا تارجت لفئتهم المحببة ، المصري الأصيل
إللي هما عايشين ع حس ثقته المستمرة من زمان !
ماركتنج سئ جداً بالرغم من إنه بيحققلهم نجاح
لكن ع المدى البعيد هيوقعهم ، و لكم ف نوكيا عبرة 🙂
----
أما بـ النسبة لـ ضمانهم ، فـ عليه كلام كويس كتير
من ناحية التعامل أو الإستبدال ، و سياسات التخصيم
مشفناش شكاوي كتير و لا مستمرة من ضمان جيجا بايت
طبعاً مفيش مكان بدون مشاكل
المهم النسب أد إيه ، و وسط كل كم عميل بيجيلك كم شكوى
------
2 - شركة MSI - الحصان الأسود 😃
الشركة دي بصراحة محيراني جداً ، ليها منتجات بتنافس و بقوة
و ليها منتجات تحس إنها ف كوكب تاني و معدية بالصدفة كدا 😃
لكن ف السنين الأخيرة ، أثبتت إنها ضلع أساسي ف المنافسة
و حجزت مكانها ف قايمة ال 3 الكبار ، و تفوقت عليهم ف بعض القطع !
----
توكيلها و المشاكل ، مسمعناش كذلك عنهم حاجة وحشة
و مفيش عملاء كتير بإستمرار إشتكوا منها
أغلب الوقت أسعارها ف النص و معقولة لكل الفئات
بتتفوق ف أوقات كتير ف فئات فوق المتوسطة و الفلاج شيب
و عملت أرقام كويسة جداً مؤخراً
شركة معتدلة ف كل حاجة و يمكن دا من أكبر أسباب نجاحهم
-----
من عيوبها التوافر القليل لـ أغلب القطع ف مختلف الفئات
مفتكرش إني دخلت محل قبل كدا و لقيت عنده منتجات متنوعة
لـ MSI ، كلها بتبقى حاجات بتوافر أقل من البراندات التانية
-----
3 - شركة ASUS ، أفضل السيئين ف رأيي
الشركة دي و خصوصاً فئة الـ ROG STRIX
تحسها ف حتة تانية خالص بعيد عن المنافسة
بميل ليها كتير ، بـ الرغم من إنها متاخرة شوية
ف حتة الإهتمام بشكل منتجاتها ، لكنها كـ ماتريال
أو كـ سبق بـ مزايا حقيقية ، لا تُقارن 🙂
-----
الوكيل بتاعها كذلك زي المذكورين فوق ، مفيش مشاكل كتيرة مستمرة
و هو لعب مؤخراً ع نقطة ذكية نوعاً ما ، و هي الرُز 😃
تقريباً هو الوحيد إللي عامل موضوع خصومات و هدايا
لأي عميل يشتري منتج بـ ضمان فينوس
بتوصل أحياناً ل 800 جنيه تقريباً ، و دا رقم مش قليل ف جهاز
أياً كانت فئته .. و حركة ليه فيها السبق و محدش بينافسه فيها
-----
لكنه حتى الأن للأسف مش مدرك قيمة المنتج إللي هو وكيله
و لا فاهم إزاي يسوق لـ دا و يتعامل ع أساس إيه
و دا زي ما وضحنا نظراً للعقلية بتاعة كل الوكلاء ، فـ هو مش غريب
لكن التفكير دا هو السائد للأسف ، و المادة هي إللي بتحكم
لكنه أنقذ نفسه ، بحتة الهدايا و الخصومات دي
و أعتقد دا من أكبر عوامل نجاحه و إستمراريته
-----
لكن برضو زي ما قلنا فوق ع جيجا بايت ، هنقول تاني ف إسوس
دا مش كفاية و مش هينجحك ع المدى البعيد
لإن عوامل النجاح الوقتي المحدود تختلف عن عوامل النجاح المستمر
لكن كله بيبص تحت رجله للأسف
------
و طبعاً مش هنتكلم عن الدعاية من البرمومتورز
لإنهم مش محتاجين بصراحة وقت يضيع ف وصفهم
لإن دول بإختصار أغلبهم مرتزقة بيجروا ورا أي جنيه
النهاردة إسوس أعظم شركة ، بكرة جيجا بايت بـ رقبتها يا ولود ال 😃
لا فيه مبدأ و لا وعي و لا دراسة لأي شئ ، MINIONS 🤪
و الإنتماء لـ صاحب شوال الرز الأكبر يا سيدي
إلا ما رحم ربي طبعاً ، ف ناس بيعملوا دعاية ، و مٌنصفين جداً
و بيشتغلوا بـ ضمير ، و فاهمين جداً المجال إللي بيتكلموا فيه
-----
طبعاً إنت مستنيني ف الأخر أرشحلك شركة تتعامل معاها 😃
بص يا بورينس .. زي ما وضحتلك ف البداية ، دا مش ترشيح جودة
دا وصف و تحليل لكذا نقطة بخصوص البيزنس دا بشكل عام
لكني هقولك إنك لازم تحدد الفئة إللي هتجيبها حسب ميزانيتك
يعني متبقاش عامل تجميعة بـ 10.000 جنيه
و تروح تجيب بوردة لوحدها ب 4000 جنيه !!!
قارن بين البراندات ف كل فئة حسب المزايا الأكتر و السعر الأرخص
حط ف بالك النقطتين دول فقط ، و بعدها فكر ف إسم البراند
بس كدا ...
----
لو الكلام عجبك ، لايك و شير
لو معجبكش ، إعتبره من وحي الخيال ، و لا يمت لـ الواقع بـ صلة
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم