متخليش حد يشتغلك بـ كلمة (( صيني )) 🤣
و لا يشتغلك بـ أسعار وهمية
هقولكم حاجة ع السريع كدا 🔥
منتجات صيني كتير إتهاجمت ف البداية لإنها مكنتش معروفة
بس دلوقتي بقت تتطلب بـ الإسم و كله عارفها
زي (( الهانتي كانتي ، و البياضة )) كمثال
دول كانوا أهم أسباب إختفاء (( الكيناكومب )) من السوق 😅
------
بالمناسبة (( زيجماتيك ، ديب كول ، تو بي )) صيني برضو 🙂
و إشتهروا حالياً ف السوق المصري ، لإن فيهم موديلات كويسة
فيه ناس كانت فاكرة الكيسات دي صناعة يابانية أو ألمانية 🤣
لكن زي ما واضح قدامكم ف الصورة ، و دا مثال و ليس حصر
فيه غيرهم ماركات كتير منتشرة ف السوق
و كلها شركات صينية ع تايوانية ، و المنتجات صينية 100% !
بس عشان الواحد مُحترم ، عمره ما عاب ف شئ مجربوش
عمري ما أهاجم أي منتج مختلف ، أو مش بنتفع بيه !
أصل كدا الجنيه إللي داخل ليا من هجومي دا هيبقى حرام !
بالعكس ، دا أنا بذكر عيوب منتجي قبل مميزاته ، للأمانة
و لكم ف فيديو مراجعة (( الكيسة الفضائية )) عِبرة
تعلمكم يعني إيه تعملوا مراجعة حلال بجد
-----
لو إتفرجت ع الفيديو بتاع (( الصيني )) هتفهم إن أغلب السوق صيني
و دا مش عيب و لا معناه جودة سيئة ، إطلاقاً
الخوف من الصيني المضروب إللي بيبوظ ، الشائع بتاع زمان
دا مش بينطبق ع شغلنا أصلاً ، فـ محدش يتاجر بالمصطلح و يخدعك
------
يا صديكي (( كله صيني )) و دا سببه إن الصين سوق عالمي
فيها تصنيع و عمالة و موقع و بيئة متكاملة مناسبة للتصنيع
و دا بيقدم عرض مناسب للشركات و الإستثمار
فـ بيفتحوا مصانعهم و ينتجوا هناك
حتى أكبر الشركات إللي أساسها (( أمريكي و ألماني و غيرها ))
بيعملوا مقرات و مكاتب و أحياناً مصانع ف الصين
و المنتج بيتكتب عليه (( صنع ف الصين )) عادي جداً
----------
متخليش حد يشتغلك و يقولك صيني
و هو أساساً بيبيعلك صيني ، أم الضحك يا شيخ !
يعني الصيني بتاعك بس إللي حلو ، و الباقي وحش 🤣
-------
هقولك معلومة مش كتير يعرفوها 🤓
الفئات المنخفضة و الإقتصادية ، أغلبها بتبقى خطوط إنتاج واحدة !
و المصانع برا بتظبطلك المنتج ع دماغك ، بس القالب شبه واحد
كمثال ، هنلاقي مصنع زيجماتيك ، هو إللي بيصنع لـ تو بي
هو إللي بيصنع لـ ديب كول ، هو إللي بيصنع الهانتي كانتي
و كل شركة بتحط مواصفات و تعديلات عشان تميز موديلاتها
لكن الخامات و قوالب التصنيع ، مع فئات معينة ، بيكون واحد تماماً
و كله ف الأخر بيحط إسم البراند ع الكرتونة و اللوجو ع الكيسة ، و شكراً
و إبقى بص ع ضهر أغلب الكيسات ، و قولي لقيت إيه 🙂
--------
إنت عندك عقل لازم تشغله
طالما المنتج إتراجع قدامك ، و إنت شفته و لقيته مناسب
كـ خامات ، و كـ مواصفات ، و بتاخد عليه ضمان من مكان موثوق
و لقيت عليه فيدباك محترم من كذا شخص جربه
خلاص ، هتحتاج إيه تاني أكتر من كدا !
إتكل ع الله و إشتري ، صيني هندي مصري بتنجاني
متخليش حد يستخف بـ عقلك و يضحك عليك 🧐
-------
كمان محدش يفسحك و يقولك المنتج برا رخيص و ببلاش و بتاع
لإنه لو كلامه صح ، قوله هاتلنا ، و إكسب ثواب و إكسب فلوس كمان
أو ورينا ع الأقل نجيبه إزاي ب الأسعار إللي بتقولها دي !
لكنه بيرمي الكلام وخلاص ، و مفيش أي شئ يفيدك كالعادة 🤮
لما تقولي إن التاجر نصاب و بيبيع أبو 10 بـ 100
يبقى تدلني ع مكان أجيب منه أبو 10 بـ 10 ، أو حتى بـ 20
الموضوع بسيط خالص
و إللي ميعملش كدا ، و مش بيوجهك لـ حل عملي تنفذه
يبقى كداب و غير أمين ، و مينفعش تتابعه و لا تاخد بـ كلامه
لإنه هيلوث لك عقلك و مفاهيمك 🤐
-------
لو الكلام عجبك ، لايك و شير 👍
لو معجبكش ، إعتبره من وحي الخيال ، و لا يمت لـ الواقع بـ صلة 🥺
و لايك و شير برضو ، متبقاش غلس 😃
تعليقات
إرسال تعليق
سيب أستفسارك وهرد عليك يانجم